The art of not being one with the universe » Why snow is good

Det er februar. Det snør.

Åsmund — Thu, 18 Feb 2010 21:10:12 +0000

Det er slik det skal vera.

Snjo

Åsmund — Thu, 17 Sep 2009 12:43:57 +0000

Den siste veka har eg sett på korleis snøen har lagt seg som eit tynt kvitt dryss langs kanten av fjella, og korleis snøkanten sakte klatra nedover etterkvart som ein såg innover Adventdalen.

I dag var det kvitt på bakken i låglandet. Vinteren nærmar seg. Kanskje han kjem før jul denne gongen.

Smeltartid

Åsmund — Tue, 05 May 2009 14:11:17 +0000

Eg var i Pyramiden i går. Der var det fullt av måse. Dei hadde omdefinert to av blokkene til fuglefjell. Å navigera over ein isbre i slett sikt der alt eg har å sjå etter er sporet til sida for meg, sidan sporet framfor meg er usynleg, er … artige greier.

Smeltartida har byrja. Det var merkbart mindre snø i Longyearbyen då me kom att enn då me drog ut, og verre var det i dag. Eg må nok snart setja Helga på stallen. Helst medan det enno er snø mesteparten av vegen dit. Pyramideturen var ein betre sesongslutt enn i fjor.

Eit samandrag av mørkret

Åsmund — Fri, 01 May 2009 16:35:50 +0000

Det er sørgjeleg varmt for tida (-2 °C) og midnattssola er i full fyr, så det er nok diverre ikkje lenge til våren startar. Dermed kan det høva med ei oppsummering av den mørke delen av vinteren.

24. januar: Ettermiddagstur til Sukkertoppen

Utsikt over fjorden

Det var visst nokre fjell der borte likevel. Det er overskya vêr, og det einaste ljoset som finst er kunstig ljos frå Longyearbyen. Både fjorden og fjella var plent usynlege med auget.

Motorkjelkar på breen.

26. januar: Klokka er midt på dagen og takluka er open.

Og desse to bileta er ein viktig grunn til å ha polarisasjonsfilter. Dei er tekne med få sekunds mellomrom, einaste skilnaden er at polafilteret har rotert.

31. januar: Utepils.

7. februar: Det går mot ljosare tider

Bøgda sett frå TV-reléet på Hiorthfjellet.

EISCAT, KHO, gruve 7.

Sneheim og Hiorthfjellgruva.

SvalSat på Platåfjellet.

Malu, og eit TV-relé.

Bøgda sett frå andre sida, oppå Longyearbreen.

10. februar: Isbading med skuterdress.

22. februar: Sol!

Vinteren er heldigvis ikkje over

Åsmund — Wed, 25 Mar 2009 12:45:52 +0000

og snøen i Barentsburg er kvit. Det var faktisk litt overraskande. Dei har kanskje fått orden på kraftverket sitt.

Fastfrosen skuter

Åsmund — Fri, 09 Jan 2009 10:30:06 +0000

Viss du parkerer ein snøskuter ute og det så snør litt og så regnar litt og så blir beinkaldt kan beltet finna på å frysa fast både til bakken og til sleiden. Trikset er ikkje å gje gass til marakkelset losnar, det berre øydelegg variatorreima (i beste fall). Ein må få tak i nokon som kan hjelpa til med å brekka skuteren laus frå seg sjølv og køyra beltet i friluft slik at isklumpane blir rista og slått laus, og så er det berre å køyra pusen sin på vårsørvis.

Vinter

Åsmund — Tue, 06 Jan 2009 07:40:45 +0000

God natt

Åsmund — Wed, 22 Oct 2008 21:53:12 +0000

Siste solgløtt var teoretisk i dag, men det var eit par fjell og skyer i vegen. Siste faktiske solgløtt eg hadde var på laurdag, då det var open dag på UNIS og eg var på taket av Kjell Henriksen-observatoriet for å måka snø og vera isbjørnvakt. Det vart kaldt då taket var ferdig måka.

Her er siste indirekte solgløtt, frå kontoret i går:

Jo, forresten, GOD CAPS LOCK-DAG.

Haust

Åsmund — Wed, 08 Oct 2008 17:37:53 +0000

Det haustast.

30. september.

30. september. Støvskyer i Adventdalen

30. september. Det bles.

30. september.

2. oktober. Det har snødd meir.

3. oktober.

6. oktober. Det minkar på ljoset.

I dag regnar det.

Ein heilt vanleg sundag

Åsmund — Sun, 05 Oct 2008 21:32:36 +0000

den femte oktober. I dag har eg vore med på båttur til Sneheim, som er eit gamalt hus frå då det var gruvedrift i Hiorthfjellet. Det var ikkje frykteleg langt, men derimot rikeleg bratt. Utsynet er i teorien flott, men det stemmer ikkje heilt når det er såpass snøvêr at flyet ikkje kunne landa.

Det kan vera bale å koma seg til Sneheim, sidan å spasera over fjorden krev langt strengare kulde enn me har no, eller nære familiære band til Vårherre. Derimot er visstnok Adventdalen såpass frosen no at det skal vera heilt trygt å gå over, og ein rypejeger me møtte hevda til og med å ha sykla over. Men me som var på denne turen fekk båtskyss. Det var Svalbard turn som skipa til turen til den minst tilgjengelege posten på sommarens topptrim. Det var ikkje så gale med snø oppi høgda. For lite til å stå på ski, men nok til at det var umogleg å vurdera fotfestet. På den andre sida var ikkje det så nøye, for det var jamt over slett pga. dei flate lause steinane som dekker alle fjellsidene. Og det har snøa meir i løpet av dagen og kvelden.
Sidan vêret var så lite strålande gløymte eg reint å ta gode bilete, men her er eit par illustrasjonar:

Sneheim er den svarte flekken til høgre ca. midt på fjellsida.

Demontering av postkasse.

Kvelden nytta eg til å sjå den fjerde Indiana Jones-filmen. Den var artig nok, sjølv om det var rikeleg med detaljar å pirka i, så som at nei, magnetfelt oppfører seg ikkje heilt slik, og hadde ein ikkje blyhagl i haglene på femtitalet, og ikkje stålhagl som den godaste Indy brukar til å finna denne magneten? Ein svært selektiv magnet, som altså ignorer bagatellar så som som ein over kuben av avstanden, og som gjerne trekker på spenna i ei geværreim, men ikkje sjølve geværet. Eller at på femtitalet kunne ein meia folk ned med maskinpistol utan at det kom ein drope blod nokonstad.

I helga vart det ein del festing: På fredag hadde Jeff og Lisa skilsmisseparty med full bryllupsoppstasing, og i går var det isbrytarfest på UNIS. Eg er stygt redd for at den siste festen får mange bilete ut på fjaseboka.

Vårteikn

Åsmund — Wed, 16 Jul 2008 19:37:33 +0000

Eit vårteikn her i nord (bortsett frå at bakken vert våt og grøn) er at champagneglaset på Operafjellet kjem fram. Når stetten så ryk er det sumar. Eller noko deromkring.